Tadhail
Fosgailte 10.00 gu 17:00 gach latha
Dùinte 25 agus 26 Dùbhlachd
Inntrigeadh saor is an-asgaidh. Feumar pàigheadh airson tiocaidean airson cuid de na tachartasan, gnìomhachdan agus taisbeanaidhean.
Port-adhair Dhùn Dè
Tha Port-adhair Dhùn Dè 10 mionaidean air falbh bhon taigh-tasgaidh ann an càr agus tha seirbheis ann gu Lunnainn Stansted gach latha.
Pàirceadh is àiteachan-stad
Tha àiteachan-stad do chòidseachean ann dìreach taobh a-muigh an togalaich agus tha pàirceadh ri fhaighinn faisg air làimh.
Tha àiteachan-pàircidh ann do dhaoine a bheil ciorram taobh a-muigh an taigh-tasgaidh. Tha tòrr a bharrachd phàircichean-chàraichean agus àiteachan-pàircidh faisg air làimh.
Chaidh an taigh-tasgaidh a dhealbhadh mar thogalach ion-ghabhaltach agus so-ruigsinneach.
- Tha fàilte
- Tha lioft ann gu gach làr
- Tha na h-àiteachean-pàircidh uile ruigsinneach do chathraichean-cuibhle
- Gheibhear cathraichean-cuibhle air iasad saor is an-asgaidh le bhith a’ cur fios thugainn ro-làimh
- Tha fàilte ro sgùtairean so-ghluasadachd beaga taobh a-staigh an taigh-tasgaidh
- Tha taighean-beaga so-ruigsinneach ann air gach làr
- Tha taigh-beag Changing Places air Làr 1
- Gabhaidh tursan a chur air dòigh airson daoine air a bheil cion-lèirsinne no a tha bodhar
- Tha lùban claisneachd aig gach puing-seirbheis anns an taigh-tasgaidh
- Tha tòrr àiteachan-suidhe ann air feadh an taigh-tasgaidh
- Tha stòlan so-ghiùlan rim faighinn air iasad airson cleachdadh anns na gailearaidhean
Airson barrachd fios mu ruigsinneachd san taigh-tasgaidh, cuir fios gu access@vandadundee.org
Thig dhan chafaidh againn sa phrìomh thalla airson srùbag no greim-bìdh luath.
Rach suas an staidhre dhan taigh-bìdh againn airson biadh agus deoch na ràithe agus na sgìre agus airson deagh sheallaidhean den Tatha agus den RDS Discovery.
Tha fàilte ro chlann anns a’ chafaidh is taigh-bìdh againn agus tha clàr-bìdh againn do chlann san dà chuid. Aig an deireadh-sheachdain agus rè saor-làithean na sgoile, faodaidh luchd-tadhail greimean-bìdh a bheir iad fhèin a-steach ithe ann an seòmar nam picnic.
Tha sinn a’ cur fàilte air beathachadh air a’ chìch anns a h-uile àite ann an, no faisg air an taigh-tasgaidh.
Tha pàirc bhugaidhean air a’ bhun-ùrlar. Cha bhi luchd-obrach a’ coimhead às dèidh nam bugaidhean - cleachdaidh tu i air do chunnart fhèin.
Tha goireasan atharrachadh-badain air a h-uile làr.
Tha a’ bhùth againn a’ comharrachadh dealbhadh nàiseanta agus eadar-nàiseanta, bho rudan a chleachdas sinn gu làitheil sa chidsean gu obair-fhighe den ìre as àirde.
Tiocaidean airson taisbeanaidhean
Uaireannan feumar tiocaidean a cheannach airson cuid de na taisbeanaidhean againn. Gheibh buidhnean de 10 no barrachd lasachadh prìse. Gus dèanamh cinnteach gum bi an turas agaibh cho math ’s a ghabhas, leig fios thugainn ro làimh ma tha sibh am beachd tighinn ann le buidheann de dheichnear no barrachd.
Tursan agus òraidean
Bho 2019, faodar buidhnean a chlàradh airson òraidean is tursan-treòraiche den taigh-tasgaidh. Bidh na tursan rim faighinn ann an diofar chànanan.
Airson barrachd fiosrachaidh, cuir fios gu bookings@vandadundee.org
Buidhnean is tursan ruigsinneach
Gabhaidh tursan BSL agus tursan-làimhseachaidh a chur air dòigh airson daoine air a bheil cion-lèirsinne no daoine a tha bodhar. Bidh tionndaidhean de leabhar-iùil an taigh-tasgaidh rim faighinn ann an clò mòr aig an deasg fàilte.
Airson barrachd fiosrachaidh, cuir fios gu access@vandadundee.org
Feuch gun a bhith a’ toirt bhagaichean mòra a-steach dhan taigh-tasgaidh. Dh’fhaodte gun iarr luchd-obrach ort pocannan-droma mòra a ghiùlan nad làmhan seach a bhith gan giùlan air do dhruim, no gun iarr iad ort an cur anns na locairean.
Tha locairean rim faighinn air a’ bhun-ùrlar, air prìs £1 (chan fhaighear an t-airgead seo air ais). Cuimhnich a h-uile rud a thoirt a-mach às na locairean mus fàg thu an taigh-tasgaidh.
Tha locairean rim faighinn ann an dà mheud eadar-dhealaichte. Tha an locair as motha comasach air aon bhaga-làimhe den mheud àbhaisteach a ghiùlan.
Thathar a’ brosnachadh togail-dhealbhan gun solasan-boillsgidh airson cleachdadh prìobhaideach neo-choimeirsealta air feadh an taigh-tasgaidh ach a-mhàin de chuid de na buill-taisbeanaidh agus cuid de na taisbeanaidhean againn a bhios ag atharrachadh. Chan fhaodar trì-chasach, aona-chasach no rioga-solais sam bith a chleachdadh ann an àite sam bith ann an, no faisg air, an taigh-tasgaidh.
Tha sinn fìor mhoiteil a bhith suidhichte ann an cridhe beul-aibhne Dhùn Dè. Mar Bhaile Dealbhachaidh aig UNESCO, tha tòrr ri dhèanamh ann an Dùn Dè agus tha an leabhar-iùil 99 Things to See and Do in Dundee, a chaidh a dhèanamh tro mhaoineachadh-sluaigh na fhìor dheagh dhòigh gus eòlas fhaighinn air a’ bhaile.
Às dèidh dhut cultar beòthail Dhùn Dè fheuchainn, carson nach tèid thu a dh’fhaicinn barrachd de Sgìre na Tatha. Tha tràighean àlainn, glinn chiùin agus biadh air leth ann an Sgìre na Tatha, a tha cuideachd a’ gabhail a-steach Siorrachd Pheairt, Fìobh agus Aonghas a tha faisg air làimh.
Cluich goilf air cùrsaichean ainmeil Chill Rìmhinn, gabh cuairt tro chruth-tìre nan coilltean àrda ann an Siorrachd Pheairt no cuir thu fhèin am bogadh ann an eachdraidh ann an Caisteal Ghlamais. Cuir an turas agad fhèin air dòigh aig taycountry.uk